OPM singer na si Jovit Baldivino, pumanaw na sa edad na 29.
Pumanaw na ang OPM singer na si Jovit Baldivino ngayong Biyernes, December 9, 2022.
Kamakailan lang ay naiulat na isinugod sa isang ospital sa Batangas City ang 29 taong gulang na singer matapos umanong sumama ang pakiramdam nito.
Ayon sa isang report, kinumpirma ng kapatid ni Jovit na si Gil Baldivino ang pagpanaw ng una ngunit wala pa itong ibinibigay na detalye tungkol sa tunay na dahilan nito.
Sa isang Facebook post naman ngayong Biyernes ng umaga, ibinahagi ng asawa ni Jovit na si Camille Ann Miguel ang larawan nila na magkasama bago mamaalam ang singer.
"Asawa ko [crying emojis]," sulat ni Camille sa kanyang post.
Bumuhos naman ang pakikiramay ng mga kaibigan at taga-suporta ng pumanaw na singer sa kanyang naiwang pamilya.
Huling napanood si Jovit sa telebisyon sa pamamagitan ng GMA game show na Family Feud, kung saan nakasama niya ang mga kanyang kapwa OPM singers, na ipinalabas noong November 28.
Nakilala si Jovit nang tanghaling kampeon sa season 1 ng reality talent show na Pilipinas Got Talent taong 2010.
PUMALAG ang asawa ng mang-aawit at “Pilipinas Got Talent” grand winner na si Jovit Baldivino sa mga kumakalat na balita patungkol sa nangyari sa kanyang mister.
May balita kasing kumakalat na diumano’y nag-collapse raw ang kanyang asawa sa isang party na wala namang katotohanan.
Nitong Martes ng madaling araw, December 6 ay naglabas na nga ng saloobin si Camille Ann Miguel, asawa ni Jovit patungkol sa maling impormasyon na kumakalat sa social media.
“Sa lahat po ng nagpo-post sa asawa ko siguraduhin nyong tama ang post nyo at di kayo nakakatulong lalo nyo pinalalala d kau nakakatulong matuto kau humingi ng permission,” naiinis na saad ni Camille.
Dagdag pa niya, “‘Wag nyo pong palalain ang sitwasyon nya!!!!!! makapag post lng kau…prayers po ang kailangan nmn d ang maling post nyo!”
Pero kinumpirma niya sa pep.ph na talagang naka-confine ngayon sa ospital si Jovit.
“He’s in the hospital right now, [we’re] asking for prayers, not fake news. Wala naman po akong ibang hiling kundi prayers para sa asawa. Nakakasama lang po ng loob na pinalalala ng fake news ang sitwasyon niya,” paglalahad ni Camille.
Nang bisitahin namin ang Facebook account ni Camille ay isang Facebook reel ang latest post nito kung saan makikita ang larawan ni Jovit at may background song na “My Everything”.
Caption pa niya, “Miss na miss na po kita love ko.”
Wala naman siyang diretsahang sinabi kung ano nga ba ang naging dahilan kung bakit nga ba na-ospital si Jovit.
Huli namang napanood ang mang-aawit noong Nobyembre sa isang episode ng “Family Feud”.
Dalangin naman namin sa Bandera ang agarang paggaling ni Jovit.
